Nerbioko parke lineala

Aiararen bihotzean.

Nerbioi ibaia Espainiako ur jauzi handiena baino gehiago da. Haranaren bizkarrezurra da. Laudiotik Amurriora ibaiertzetik doan ibilaldi honetan zehar dorreak, errotak eta Erdi Aroko zubiak ezagutu ahalko dira, barboak oraindik ere saltoka aritzen direla egiaztatzeaz gain.

Ibaiaren korridorea. Beste begirada bat

Ibaia funtsezkoa izan zen haran honetako industria eta nekazaritza garatzeko, baina, urte luzetan zehar, ez zen behar bezala zaindu. Hala ere, pixkanaka, ibaiaren korridore hori bere basabizitza berreskuratuz joan da. Ibaiertzera hurbilduz gero, lizarrez eta haritzez gozatu ahalko dugu erriberako basoetan, eta koartza hauskarez, lepazuriez eta bestelako hegazti anatidoez ere bai, eta auskalo, gaueko isiltasunean, bisoi europarren bat ere ikusiko dugu agian. Ur gehiagoren bila bagabiltza, handik hurbil daude Delikako arroila, bere 270 metroko ur jauziarekin, edo Maroñoko urtegia.

Ibilaldia historian zehar. Errotak eta zubiak

Ibiltaria edo txirrindularia edonondik irteten dela ere, ibilaldi honek 10 kilometro ditu. Abiatu eta metro gutxira, Erdi Aroko zubiren bat edo pasabide modernoagoren bat (Olako, Zabalibar, Zamora, Markijana, Zubibarrio, Olarte, Otazu edo Gardea) aurkituko du zalantzarik gabe. Erroten hondarrak ere ikusiko ditu laster, edo XVI. mendera bidaiarazten gaituzten eta monumentu multzo izendatu diren dorre aiararrak, Haraneko jaunen leinu eta bandoen arteko gerrak gogora ekartzen dituztenak.

Sorpresaz betetako bidea. Luiaondo

Ibilaldi hau ezin hobea da ikusmina asetzeko. Begiak ez dira geldirik egongo. Ur baketsuetatik basoko lasaitasunera igaroko dira, edo zubien segurtasunera. Ferratokia, elizak, baselizak, Malato zuhaitza, gurutze bat, likorearen museoa, parkeak, mendiak eta hirigune historiko oso bat ere ikusiko dituzte. Zer gehiago eska dakioke doako ibilaldi bati?

1. Ibaia metalezko lehenengo pasabide gorritik gurutzatu eta norabide berean jarraituko dugu beste ibaiertzetik. Hurrengo kilometroetan zenbait bider ibiliko zara ibaiaren alde batera eta bestera.
2. Luiaondon (Aiara) sartuta, ibaia gurutzatuko dugu berriz beste pasabide gorri batetik, eta herriko etxeetara hurbilduko gara. Etxe artean ibiliko gara eta Zubibarri zubia igaroko dugu, gure bidea ibiliz Luiandoko geralekuraino.
3. Pasabide handi batera iritsiko gara. Zeharkatu egingo dugu, ibaiaren beste ertzera iristeko.
4. Salbioko geralekura heldu gara.
5. Olako auzora heldu gara. Ibilbidearen amaiera.